الرئيسية / جامعات ومدارس / كيف نطالب الطلاب متابعة الدراسة والاستقرار النفسي عندهم مفقود؟

كيف نطالب الطلاب متابعة الدراسة والاستقرار النفسي عندهم مفقود؟

بوابة التربية: سألت النقابية ملوك محرز، كيف أطلب من طلابي متابعة الدراسة والاستقرار النفسي عندهم مفقود، ونحن نعيش أزمة إقتصادية خنقت الناس، وذعر صحي أرعب الكل، ونتج عنه عدم استقرار نفسي طال كل الناس بما فيهم الطلاب..

بعيدا عن المزايدات والتنظير والسكوبات التربوية والنكايات والخلافات السياسية المذهبية ومع إحترامي للجميع بس بدكم تسمحولي وبكل واقعية وشفافية أحكي الأمورببساطة؛

ما حدا ضد التطور التربوي  ولا حدا بيكره التغيير للافضل وكلنا منسعى للأفضل بدون تردد، بس بدي إسال المبادرين هل شايفين الامور مريحة بالبلد اقتصاديا وصحيا واجتماعيا!!!؟؟

هل شايفين الوضع العام جيد والناس مرتاحة!؟؟

مش ملاحظين في حالة جمود بالعالم ونحن جزء من هالعالم!؟

المانيا وفرنسا وايطاليا والكويت كلها وقفت الدراسة يعني كل الكرة الارضية توقفت الدراسة فيها..!!

والكل مكرس طاقته للحد من انتشار الوباء وحماية الناس ومش استكمال عام دراسي،،!!

الغريب بالموضوع عنا عم نسمع إصرار على الية التعلم عن بعد واجتهادات واجتماعات وكثرة تحليلات ونظريات و….الخ

اذا بدي احكي بأنانية واتصرف بأنانية كنت بقول من اول يوم بلشت الازمة ومن موقعي التربوي ان نحن مع هالطريقة وفيي نفذها لأن بكل تواضع زملائي بأسرة الثانوية كانوا مبلشين فيها قبل الازمة ولان عندي ثقة كبيرة بأن ولادي وبقصد  #طلابي #قادرين يتفاعلوا مع هالطريقة..

بس من أول الازمة ما حكيت على هالطريقة ولا طلبت ولا شددت لا عالطلاب ولا على الأهل بهالموضوع وبنفس الوقت طلبت من الزملاء التعامل مع الطلاب بهالطريقة بالمرونة والتودد (بس ليبقوا بجو الدراسة مش أكثر)

لأن مقتنعة ان بهالواقع الاقتصادي والصحي ما بتنفع ولا بتفيد..

نحن اليوم عم نعيش أزمة إقتصادية خنقت الناس وذعر صحي رعب الكل ونتج عنه عدم استقرار نفسي طال كل الناس بما فيهم الطلاب..

#نعم بكل بساطة هيدي الحقيقة..#

ف كيف بدي أطلب منهم يتابعوا الدراسة والاستقرارالنفسي عندهم مفقود!!!

ولأني تعودت كون صريحة وقريبة منهم كل هالفترة كنت عم اقرأ كلماتهم اللي كلها خوف ويأس وكنت عم تابع حوارتهم وإسمع هواجسهم المحقة ..

وكلهم عم يقولوا(نحن ضعنا وما عم نعرف شو مصيرنا)..

كنت عم إسمع كلمات اللي خايف ع بيو لان بطل عندو شغل والشركات توقفت ..

واللي خايف أمه يصيبها عدوى لان ما فيها تبطل شغل …

واللي خايف ع أهلو لان ما عندن مناعة… ومامعهم كلفة الطبابة..

واللي قال بالصف منسأل مليون سؤال حتى نفهم كيف بدكم تردوا علينا اونلاين!!

واللي قال يا مدام نحن عنا الواي فاي ضعيف لان مشترك مع جيرانا وما فينا ندفع لوحدنا…

وبعد في كتير أشياء انقالت من ولادنا #طلابنا#

اللي منشوف حالنا فيهم…

واللي منتفهم ومنحترم ظروفهم…

وبكل صراحة وموضوعية ما في ما إسمعهم

ومافي ما صدقهم واتفهمهم..

وإنقل وجعهم وخوفهم للكل لان كلامهم واقعي ومحق…

وبعد مرور شهر عالازمة بقلهم اليوم..

إنتو بنظرنا أبطال لان اللي تحملتوا هالسنة كان فوق طاقتكم

إنتو بنظرنا أبطال لان كملتو بعد تعطيل الثورة وكنتو جديين (رغم مشاغباتكم المهضومة)

إنتو بنظرنا النور اللي لح يغير ويتطور بلدنا لانكم كنتو بحراك ١٧تشرين مبادرين وقادة مسؤولين..منشوف حالنا فيهم…

وبدي إختم وقول متل ما حكيتكم من كم يوم

ع مجموعاتكم:

إشتقتلكم كتير وإشتقت لعجقتكم وغلاظتكم وهضمنتكم

إشتقت  لمخالفاتكم البريئة وللنق (بدنا وبدنا)

اشتقت اصطبح بالمتأخرين …

بعرف ان اللي عم تمروا فيه صعب

بس بعرف منيح انكم قادرين تتفاعلوا وتشتغلوا ع حالكم

بعرف ان كتار منكم مكتئبين بس تذكروا ان ربنا موجود وما لح يتخلى عنكم

بعرف ان التعلم عن بعد مش حل عادل ولا واقعي بس منحاول ومش لح نخسر ..

وختمت: وعد منا الكم ما لح نعمل شي #يخسركم ولح نضل حدكم ومعكم ..#

عن mcg

شاهد أيضاً

أيوب: لن نقف مكتوفي الأيدي أمام أي شخص يعمد إلى تشويه صورة الجامعة اللبنانية

بوابة التربية: صدر عن رئيس الجامعة اللبنانية البروفسور فؤاد أيوب، بيان توضيحي الى الرأي العام …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *